المحرر الرباط
سي المدير ديال المشتريات فسانطرال، خرج من نافذة هيسبريس باش يهضر على الضرب فالمنتوجات ديال الوطن، قبل أن يصف المقاطعين بالخونة، و هو كايتحمل المسؤولية ديالو فيما يقول.
و الا كان الضرب فحليب فيه غير الما و الزغاريت خيانة للوطن، أشنو غادي نسميو الضرب فجيوب عباد الله أ سي المدير؟ بطولة؟ عياقة؟ استعراض للعضلات؟ علما أن الثمن ديال لحليب ديالكم كاضاعف الثمن ديال حليب طاليان و فرانسا لي اليد العاملة فيهم غالية و المادة الخام غالية.
و عوض ما تهضر لينا حنا على الفلاح و المصير ديالو، سير قولها لاخنوش لي ضرب صندوق ديال تنمية العالم القروي فيه الملايير، لوكان تعطات الفلاح كاع مايحتاج للتعاونية ديالك باش تشري منو لحليب بزوج ريال.
لوكان كنتو فدولة أوروبية أسي المدير واش غادي ضحكوا على الفلاح بذاك الثمن لي كاتشريو من عندو بيه الحليب؟ واش غادي ديرو داك لحليب لي ماعرفناه واش حليب نيت ولا غا غبرة مخلطة بالما فلكراطن و دفعوه للمداويخ و الخونة؟؟؟
المهم الا كانت المقاطعة ديال شركة سنطرال خيانة أ سي المدير، جبد ورقة و ستيلو و قيدني أنا اللول خائن و مدوخ و لي بغيتي، غا هو والله لا شريت حليب سنترال بالله….
و في انتظار ذلك هبط الثمن و تسنا لمغاربة الا بغاو يشريو حليبكم …. تهلا.