المحرر العيون
الوزير بوسعيد لي وصفنا بأننا مداويخ، والله ما كذب ايها الاخوة و الاخوات، راه حنا مداويخ و الوالدين ديالنا حتى هوما مداويخ، و أكثر من 90 فالمائة ديال الشعب المغربي كلهم مداويخ، وبلا ماتقلقوا لانني سوف اشرح لكم لماذا.
غادي نهضر على راسي باش مايتقلق مني حتى واحد … فاش كان سي بوسعيد و سي اخنوش كايقراو الاقتصاد و متبعين قرايتهم، كانوا لمداويخ ديال الواليد و جدي هازين السلاح عساسين عليهم فالحدود حتى يرجعوا للبلاد باش يحكموا ولادهم … واش حنا ماشي مداويخ؟
فاش كان الحاج أخنوش الاكبر، كايمارس مهنة التجارة و كايجمع لفلوس، كان لمدوخ ديال جدي كايتسنا فمحمد الخامس يبان فالقمر، و كان يضل هو و لعسكر ديال فرانسا جري عليا نجري عليك… واش هذا ماشي مدوخ؟؟
فاش كان سي بوسعيد كايشري الارض فطريق زعير ب 350 درهم للمتر باش يبني فيها فيلا، كنت أنا كانقلب على لكرا فدوار الحاجة، و صباطي تقطع وانا كاندور على السمسارة، واش انا ماشي مدوخ أ خوتي؟ واش حنا ماشي مداويخ؟
حنا مداويخ و واليدينا حتى هوما مداويخ، لانه فاش كان سي مولاي حفيظ العلمي كايبيع فساهام بالطريقة المعروفة، كنا حنا مقابلين منار فدوزيم، و ملهيين مع البوليساريو و مصلحة الوطن…
المهم السيد الوزير عندو الحق، و بلا مايتقلق حتى واحد، و لي عندو شي دريري الله يخليه ليه، يقريه الاقتصاد و السياسة، لا يساهم فتكاتر المداويخ فهاد البلد السعيد، و لي ماعندوش راه المكتوب ديالو يكون من المداويخ يصبر و صافي.