المحرر متابعة
هذا لي مع الملك هو جون بومبي ماغوفولي ، رئيس تنزانيا لي تم إنتخابه في 2015 وهديك لي حداه هي نائبة الرئيس سامية صولوحو
ماغوفولي عندو الدكتوراه في الكيمياء وبدا كأستاذ في الثانوية ثم خدم مع شركة صناعية قبل ما يدخل للسياسة
ووخا الدولة ديالو هي تنزانيا لكن ما كاي طنزش مع الفساد
* مازال ما كملاتش 24 ساعة على فاش خدا منصب الرئيس ، مشى في زيارة مفاجئة لوزارة المالية ، وعاقب الموظفين و المدراء لي مغيبين
* وقف الاحتفالات الرسمية ديال يوم الاستقلال لي كيخسرو عليها بزاف ،وحول هدوك الفلوس لمحاربة وباء الكوليرا ، و دعا الناس باش أنهم في هداك النهار يخرجو ينقيو الشوارع ديال البلاد ، وتزعمهم في هاد الحملة ديال النظافة.
*نقص عدد الوزراء من 30 وزير في الحكومة ل 19 وزير ، و طلب من جميع وزراءه الكشف على أرصدتهم وممتلكاتهم، وهدد بإقالة أي وزير ما غديش يكشف على دكشي أو ما غاديش يوقع على تعهد بالنزاهة.
* منع جميع سفريات المسؤولين للخارج بغير ترخيص مباشر منو حيث في نظره هدوك المسؤولين خاص يهتمو بالمشاكل الداخلية ، أما دكشي ديال برا فكاين سفراء لي يهتمو به ، كما منع المسؤولين في الحكومة ديالو يشدو درجة أولى في الطائرات ، ومنع اللقاءت والندوات ديال الحكومة في الفنادق وفي لقاء الكومنولث أرسل 4 ديال المسؤولين فقط باش يمثلو البلاد بدل 50 لي كانو معولين يمشيو.
* دار زيارة مفاجئة للمستشفى الرئيسي في الدولة، ولقى أنه كاين مرضى كينعسو على الأرض ، ولقى أيضا آلات طبية ما خدماش، فعزل جميع المسؤولين ديال المستشفى ، وأعطى مهلة ديال اسبوعين للإدارة الجديدة باش يقادو الآلات لكن صلحو كلشي في ثلاثة أيام فقط.
* نقص من ميزانية حفلة إفتتاح البرلمان الجديد من 100 ألف دولار ل 7 آلاف دولار و حول هدوك الفلوس للسبيطار لي ناقصينو الناموسيات
.
* أرسل رئيس الوزراء في تفتيش مفاجئ لميناء دار السلام، واكتشف وجود تجاوزات ضريبية واختلالات ديال 40 مليون دولار من العائدات، فأمر بإعتقال رئيس الديوانة ديال تنزانيا مع خمسة من كبار مساعديه، وبدا تحقيق جنائي.
* أمر بجمع جميع 4×4 ديال الدولة الغالين وباعهم في المزاد العلني ، وعوضهم بسيارات تويوتا ڤيتز وقال للمعارضين ديال هاد الخطوة “هادي الخدمة العمومية و ماشي قطار ديال المرقة. أي واحد جا هنا باش يدير فلوس خاص يستقيل و يمشي للقطاع الخاص جميع الوزراء وكبار المسؤولين جاو هنا باش يخدمو وما شي باش يقلبو على الثراء الفاحش. أنا ما بغيتش نشوفهم سايقين هدوك سيارات 4×4 الكبيرة وإذا أصرو ، يمكن يشريوهم من فلوسهم وما علينا غير نخلصو لهم ليصانص وأمرت البوليس يشدو أي سيارة 4×4 ديال الدولة ، ويتم متابعة المسؤول لي سايقها”.
* دار مراجعة شاملة لعقود جميع الشركات لي كانت ديال الدولة وتم خوصصتها ، وعطا مهلة ديال 30 يوم للمستثمرين يلتزمو بالوجبات ديالهم ولا يتحيدو لهم الشركات
* ماغوفولي تمت تسميته بالبولدوزر (الجرافة) حيث خدام في اجتثاث ومحاربة الفساد في تنزانيا من النهار الأول ديالو في السلطة كيف وعد في الحملة الإنتخابية ، بدون ما يقول لا عفا الله عما سلف ، لا كاين عفاريت وتماسيح
و صراحة كون غير الملك دا معاه حتى بنكيران و رؤساء الجهات و الوزراء المحتملين وأغلب المسؤولين، يدير لهم ماغوفولي شي سطاج ديال سيمانة في التسيير و محاربة الفساد عل وعسى تتغير شي حاجة في البلاد..